കൊറോണയ്ക്ക് പിന്നാലെ പ്രളയം???? 'തമിഴ്നാട് വെതർമാൻ്റെ' പ്രവചനം ആശങ്കകൾ കൂട്ടുന്നു ?

ദീർഘകാലാടിസ്ഥാനത്തിലുള്ള നിരീക്ഷണങ്ങളിൽ നിന്ന് മനസ്സിലാകുന്നത് ഈ വർഷം സംസ്ഥാനത്ത് 2300 മില്ലിമീറ്ററിലധികം മഴ ലഭിക്കുമെന്നാണെന്ന് തമിഴ്നാട് വെതർമാൻ പ്രവചിക്കുന്നു.

കൊറോണയ്ക്ക് പിന്നാലെ പ്രളയം???? 'തമിഴ്നാട് വെതർമാൻ്റെ' പ്രവചനം ആശങ്കകൾ കൂട്ടുന്നു ?

കഴിഞ്ഞ രണ്ട് വര്‍ഷവും മൺസൂൺ കാലം കേരളത്തില്‍ ദുരിതത്തിന്‍റേതായിരുന്നു. 2018ലെ മഴക്കാലത്ത് സംസ്ഥാനത്ത് എത്തിയ മഹാപ്രളയത്തിനു പിന്നാലെ 2019ലും പ്രളയത്തോളം വരുന്ന മഴക്കെടുതിയാണ് മൺസൂൺ കാലത്ത് ഉണ്ടായത്. എന്നാല്‍ 2020ൽ സംസ്ഥാനം കൊറോണയെ നേരിടുമ്പോള്‍ ഇതിനു പിന്നാലെ പ്രളയവും എത്തുമോ എന്നാണ് പലരും ചോദിക്കുന്നത്. എന്നാല്‍ മൺസൂൺ തുടങ്ങാൻ ഒന്നര മാസം ബാക്കി നിൽക്കേ പ്രവചനവുമായി എത്തിയിരിക്കുകയാണ് തമിഴ്നാട് വെതര്‍മാൻ.

കാലാവസ്ഥാ പ്രവചനങ്ങളുടെ കാര്യത്തില്‍ തമിഴ്നാട് വെതര്‍മാൻ എന്ന സോഷ്യല്‍ മീഡിയ ഹാൻഡില്‍ പലപ്പോഴും ശ്രദ്ധ നേടാറുണ്ട്. ഫേസ്ബുക്കിലും ട്വിറ്ററിലും കാലാവസ്ഥാ സംബന്ധമായ വിവരങ്ങള്‍ സ്ഥിരമായി നല്‍കുന്ന പ്രദീപ് ജോൺ എന്നയാളാണ് കേരളത്തിലെ മഴക്കാല പ്രവചനവുമായി രംഗത്തെത്തിയിരിക്കുന്നത്. താൻ ഒരു കാലാവസ്ഥാവിദഗ്ധനല്ലെന്നും കാലാവസ്ഥാ റിപ്പോര്‍ട്ടുകള്‍ അടിസ്ഥാനപ്പെടുത്തി താൻ ഇക്കാര്യങ്ങള്‍ വ്യാഖ്യാനിച്ച് എഴുതുക മാത്രമാണ് താൻ ചെയ്യാറുള്ളതെന്നുമാണ് പ്രദീപ് ജോൺ തന്‍റെ ഫേസ്ബുക്ക് പേജില്‍ വ്യക്തമാക്കുന്നത്. എന്നാല്‍ സ്ഥിരമായി അപ്ഡേറ്റ് ചെയ്യപ്പടുന്ന പേജ് ഏഴുലക്ഷത്തോളം പേര്‍ പിന്തുടരുന്നുണ്ട്.

2018ല്‍ കേരളത്തിലുണ്ടായ പ്രളയം ചരിത്രത്തിന്‍റെ ഭാഗമാണെന്ന് പലരും വിലയിരുത്താനുള്ള കാരണം ഇതിനു 1924ലെ പ്രളയവുമായുള്ള വലിയ സമാനതയായിരുന്നു. നൂറു വര്‍ഷം മുൻപുണ്ടായ വൻ പ്രളയത്തില്‍ നാശമുണ്ടായ പ്രദേശങ്ങളിലാണ് 2018ലും പുഴകള്‍ നിറഞ്ഞൊഴുകിയത്. അതുകൊണ്ടു തന്നെ 1924ന്‍രെ ആവര്‍ത്തനമായിരുന്നു 2018ലെ പ്രളയം. എന്നാല്‍ 1920കളില്‍ മഹാപ്രളയമുണ്ടായ വര്‍ഷത്തിനു തൊട്ടു മുൻപ് രണ്ട് മഴക്കാലങ്ങളും സംസ്ഥാനത്ത് മികച്ച മഴയാണ് ലഭിച്ചതെന്നാണ് തമിഴ്നാട് വെതര്‍മാൻ ഫേസ്ബുക്ക് പോസ്റ്റില്‍ ചൂണ്ടിക്കാട്ടിയിരിക്കുന്നത്.

സാധാരണ തെക്കുപടിഞ്ഞാറൻ മൺസൂണില്‍ കേരളത്തിനു ലഭിക്കുന്ന മഴയുടെ മൂന്നിരട്ടി ലഭിച്ചത് 150വര്‍ഷത്തില്‍ ഒരിക്കല്‍ മാത്രമാണെന്നും അത് 1924ലാണെന്നുമാണ് തമിഴ്നാട് വെതര്‍മാൻ പറയുന്നത്. സാധാരണഗതിയില്‍ ജൂൺ മുതല്‍ സെപ്റ്റംബര്‍ വരെയുള്ള തെക്കുപടിഞ്ഞാറൻ മൺസൂൺ കാലത്ത് കേരളത്തില്‍ 2049 മില്ലിമീറ്റര്‍ മഴയാണ് കേരളത്തിില്‍ ലഭിക്കുന്നത്. എന്നാല്‍ ഈ നൂറ്റാണ്ടില്‍ മികച്ച മഴ കിട്ടിയ വര്‍ഷങ്ങള്‍ കുറവാണ്. എന്നാല്‍ 2007ല്‍ മാത്രം 2786 മില്ലിമീറ്റര്‍ മഴയാണ് ലഭിച്ചത്. 2013ൽ 2562 മില്ലിമീറ്ററും മഴ ലഭിച്ചു. കഴിഞ്ഞ 18 വര്‍ഷത്തിനിടെ മികച്ച മഴ ലഭിച്ചത് രണ്ട് വര്‍ഷം മാത്രമായിരുന്നു. എന്നാല്‍ 2018ല്‍ കേരളത്തിിന് ലഭിച്ചതാകട്ടെ 2517 മിമി മഴയാണ്. ഇത് 2007ലെയും 2013ലെയും മഴയെക്കാള്‍ കുറവാണെങ്കിലും വളരെ കുറഞ്ഞ സമയത്തിനുള്ളില്‍ പെയ്തിറങ്ങിയതിനാല്‍ അത് 1924ലും 1961ലും ഉണ്ടായതു പോലെ വലിയ പ്രളയമായി. 1946ഉം 1947ലും കേരളത്തില്‍ മികച്ച മഴ ലഭിച്ചിരുന്നു. പ്രദീപ് ജോൺ പോസ്റ്റില്‍ കുറിക്കുന്നു.

കേരളത്തിന്‍റെ പ്രളയചരിത്രത്തില്‍ 1924, 1961, 2018 എന്നീ വര്‍ഷങ്ങളാണ് ഏറ്റവും പ്രധാനപ്പെട്ടതെന്നാണ് തമിഴ്നാട് വെതര്‍മാന്‍റെ നിരീക്ഷണം. 1920കളില്‍ കേരളത്തില്‍ ഹാട്രിക് മഴയാണ് പെയ്തത്. 1922ല്‍ 2318 മിമിയും 1923ല്‍ 2666 മിമിയും മഴ പെയ്തു. ഇതിനു പിന്നാലെയായിരുന്നു 3115 മിമി മഴ പെയ്ത 1924ലെ പ്രളയം. ഈ ചരിത്രം ഈ പതിറ്റാണ്ടിലും ആവര്‍ത്തിക്കുകയാണോ എന്നാണ് ചോദ്യം. കാരണം 2018ല്‍ 2517 മിമിയും 2019ല്‍ 2310 മിമിയും കേരളത്തില്‍ മഴ ലഭിച്ചു. 2020ല്‍ എന്താണ് സംഭവിക്കാൻ പോകുന്നതെന്നാണ് പ്രദീപ് ജോണിന്‍റെ ചോദ്യം. ദീര്‍ഘകാല നിരീക്ഷണങ്ങള്‍ കാണിക്കുന്നത് ഈ വര്‍ഷവും സംസ്ഥാനത്ത് മികച്ച മഴ ലഭിക്കുമെന്നാണെന്നും 2300 മില്ലിമീറ്ററിലധികം മഴ 2020ല്‍ ഉണ്ടായാലും അത്ഭുതപ്പെടാനില്ലെന്നുമാണ് വെതര്‍മാന്‍റെ നിരീക്ഷണം. അതേസമയം, പ്രവചനങ്ങള്‍ എപ്പോഴും അതേപടി സംഭവിക്കണമെന്നില്ലെന്ന കുറിപ്പും തമിഴ്നാട് വെതര്‍മാൻ പോസ്റ്റിന് അവസാനം ചേര്‍ത്തിട്ടുണ്ട്.

ഈ വര്‍ഷം സംസ്ഥാനത്ത് കാലവര്‍ഷം ജൂൺ ഒന്നിനു തന്നെ എത്തുമെന്നാണ് കാലാവസ്ഥാവകുപ്പിന്‍റെ പ്രവചനം. സാധാരണ മൺസൂൺ ഈ വര്‍ഷമുണ്ടാകുമെന്നും കേരളത്തില്‍ മൺസൂൺ ദീര്‍ഘകാല ശരാശരിയുടെ 100 ശതമാനവും ലഭിക്കുമെന്നുമാണ് ഭൗമശാസ്ത്ര മന്ത്രാലയം സെക്രട്ടറി മാധവൻ രാജീവൻ പത്രസമ്മേളനത്തില്‍ അറിയിച്ചത്. ചെന്നൈയില്‍ ജൂൺ നാലിനും ഡൽഹിയില്‍ ജൂൺ 27നും മഴയെത്തും. അതേസമയം, കാലാവസ്ഥാ പ്രവചനം അനുസരിച്ച് സംസ്ഥാനത്ത് 2000 മിമി മാത്രം മഴയാണ് പ്രതീക്ഷിക്കാനാകുക. പ്രളയം ഉള്‍പ്പെടെയുള്ള പ്രകൃതിദുരന്തങ്ങള്‍ക്കുള്ള സാധ്യതയും കാലാവസ്ഥാവകുപ്പ് പ്രവചിച്ചിട്ടില്ല.

Kerala has only once in last 150 years had hat-trick of great SWM. It was way back in 1920s. Will it be three time in a...

Posted by Tamil Nadu Weatherman on Thursday, 16 April 2020