ആരോഗ്യ സേതു ആപ്പ് യാത്രാ പാസ്സായി ഉപയോഗിക്കാമെന്ന് പ്രധാനമന്ത്രി
Editor 
ലോക്ക്ഡൌണ്‍ നിലനില്‍ക്കുന്ന സാഹചര്യത്തില്‍ ആരോഗ്യ സേതു ആപ്പ് യാത്ര ചെയ്യുന്നവര്‍ക്ക് ഇ-പാസ് ആയി ഉപയോഗിക്കാന്‍ കഴിഞ്ഞേക്കുമെന്ന് പ്രധാനമന്ത്രി നരേന്ദ്ര മോദി അറിയിച്ചു. മുഖ്യമന്ത്രിമാരുമായുള്ള വീഡിയോ കോണ്‍ഫറന്‍സിനിടെയാണ് നരേന്ദ്രമോദി ഇക്കാര്യം വ്യക്തമാക്കിയത്. കോവിഡ് 19 നെതിരെ പോരാടുന്നതില്‍ അത്യാവശ്യഘടകമായ ആപ്പാണ് ആരോഗ്യ ആപ്പ്.
https://play.google.com/store/apps/details?id=nic.goi.aarogyasetu
ആപ്പ് കൂടുതല്‍പേരും ഡൌണ്‍ലോഡ് ഉറപ്പാക്കുന്നതിലൂടെ ആരോഗ്യ സെതു ആപ്ലിക്കേഷൻ കൂടുതല്‍ ജനപ്രിയമാക്കുന്നതിനെക്കുറിച്ചും പ്രധാനമന്ത്രി പറഞ്ഞു. കൂടാതെ ദക്ഷിണ കൊറിയയും സിംഗപ്പൂരും കോണ്‍ടാക്റ്റ് ട്രെയ്സ് ചെയ്യുന്നതില്‍ എങ്ങനെയാണ് ഈ ആപ്ലിക്കേഷന്‍ വിജയകരമായി ഉപയോഗിച്ചതെന്നും അദ്ദേഹം പരാമര്‍ശിച്ചു. അത്തരം അനുഭവങ്ങളെ അടിസ്ഥാനമാക്കി, ഇന്ത്യ പകർച്ചവ്യാധിക്കെതിരായ പോരാട്ടത്തിൽ ആപ്ലിക്കേഷനിലൂടെ സ്വന്തം ശ്രമം നടത്തിയെന്നും,മറ്റൊരിടത്തേക്ക് യാത്ര ചെയ്യുവാന്‍ ഈ ആപ്ലിക്കേഷൻ ഇ-പാസ് ആയി ഉപയോഗിക്കാനുള്ള സാധ്യതയെക്കുറിച്ചും അദ്ദേഹം വ്യക്തമാക്കി.
ലോക്ക്ഡൌണ്‍ രണ്ടാഴ്ച കൂടി നീട്ടുന്നതിൽ സംസ്ഥാനങ്ങൾക്കിടയിൽ അഭിപ്രായ സമന്വയമുണ്ടെന്നും നേരത്തെ സർക്കാരിന്‍റെ മുദ്രാവാക്യം ‘ജാൻ ഹേ ജഹാന്‍ ഹേ എന്നത് ഇപ്പോൾ ‘ജാൻ ഭീ ജഹാൻ ഭീ’ ആണെന്നും അദ്ദേഹം പറഞ്ഞു.
എന്താണ് ആരോഗ്യ സേതു?
കൊറോണ വൈറസ് അണുബാധ പിടിപെടുന്നതിനുള്ള അപകടസാധ്യത സ്വയം വിലയിരുത്താൻ ആളുകളെ സഹായിക്കുന്ന ഒന്നാണ് ഈ ആപ്പ്. കട്ടിംഗ് എഡ്ജ് ബ്ലൂടൂത്ത് സാങ്കേതികവിദ്യ, അൽഗോരിതം, കൃത്രിമബുദ്ധി എന്നിവ ഉപയോഗിച്ച് ഉപയോക്താക്കളുമായുള്ള മറ്റുള്ളവരുടെ ആശയവിനിമയത്തിന്‍റെ അടിസ്ഥാനത്തിലാണ് ഇത് കണക്കാക്കുന്നത്.
ഒരു സ്മാർട്ട് ഫോണില്‍ ഇൻ‌സ്റ്റാൾ ചെയ്തശേഷം, ആ ഫോണിന്‍റെ സാമീപ്യത്തിൽ വരുന്ന ഇതേ ആപ്ലിക്കേഷന്‍ ഇന്‍സ്റ്റാള്‍ ചെയ്തിട്ടുള്ള മറ്റ് ഉപകരണങ്ങൾ ഇത് കണ്ടെത്തുന്നു. ഈ കോൺ‌ടാക്റ്റുകളിലേതെങ്കിലും പോസിറ്റീവാവുകയാണെങ്കില്‍ മറ്റ് അത്യാധുനിക പാരാമീറ്ററുകൾ അടിസ്ഥാനമാക്കി അണുബാധ ഉണ്ടാകുവാനുള്ള സാധ്യത കണക്കാക്കാൻ അപ്പിന് കഴിയും.
കോവിഡ് 19 അണുബാധയുടെ അപകടസാധ്യത വിലയിരുത്തുന്നതിനും ആവശ്യമായ സ്ഥലങ്ങളിൽ ഐസോലേഷന്‍ ഉറപ്പ് വരുത്തുന്നതിനും ആവശ്യമായ സമയബന്ധിതമായ നടപടികൾ സ്വീകരിക്കുന്നതിനും ആരോഗ്യ സേതു ആപ്ലിക്കേഷൻ സർക്കാരിനെ സഹായിക്കുമെന്നാണ് പ്രതീക്ഷ.
സ്വകാര്യത ഉറപ്പ് വരുത്തുന്ന രീതിയിലാണ് ഈ ആപ്പ് രൂപകല്‍പ്പന ചെയ്തിട്ടുള്ളത്. ആപ്ലിക്കേഷൻ ശേഖരിക്കുന്ന വ്യക്തിഗത വിവരങ്ങള്‍ അത്യാധുനിക സാങ്കേതികവിദ്യ ഉപയോഗിച്ച് എൻ‌ക്രിപ്റ്റ് ചെയ്യുകയും മെഡിക്കൽ ഇടപെടൽ ആവശ്യമുള്ളത് വരെ അവരവരുടെ ഫോണിൽ ഈ വിവരങ്ങള്‍ സുരക്ഷിതമായിരിക്കുകയും ചെയ്യും.ഇത് 11 ഭാഷകളിൽ ലഭ്യമാണ്, ഒന്നാം ദിവസം മുതല്‍ തന്നെ പാൻ-ഇന്ത്യ ഉപയോഗത്തിന് ആപ്ലിക്കേഷൻ തയ്യാറാണെന്നും ഇലക്ട്രോണിക്സ് ആന്‍ഡ് ഐടി മന്ത്രാലയത്തിന്‍റെ പ്രസ്താവനയിൽ പറയുന്നു.
ആരോഗ്യ രംഗത്തെ അടിസ്ഥാന സൌകര്യങ്ങള്‍ ശക്തിപ്പെടുത്തുന്നതിനെക്കുറിച്ചും ടെലി മെഡിസിൻ വഴി രോഗികളിലേക്കെത്തുന്നതിനെക്കുറിച്ചും പ്രധാനമന്ത്രി മോദി യോഗത്തിൽ സംസാരിച്ചു. തിരക്ക് തടയാൻ കാർഷികോൽപ്പന്നങ്ങൾക്ക് നേരിട്ടുള്ള വിപണനം പ്രോത്സാഹിപ്പിക്കാം,ഇതിനായി മോഡൽ എപിഎംസി നിയമങ്ങൾ വേഗത്തിൽ പരിഷ്കരിക്കണം. അത്തരം നടപടികൾ കർഷകര്‍ക്ക് അവരുടെ വീട്ടുവാതിൽക്കൽ വിൽക്കാൻ സഹായികമാകുമെന്നും അദ്ദേഹം പറഞ്ഞു
